याहो या ! सर्वही मिळोनी रिझवू सद्‌गुरुरायासी -राष्ट्रसंत तुकडोजी महाराज भजन

रिझवू सद्‌गुरुरायाशी

याहो या ! सर्वही मिळोनी

रिझवू सद्‌गुरुरायासी /

स्वधर्म जागृत करु आपुला 

लागु या व्यवसायासी // धृ. //

परधर्माला टाकुनि मागे

भय सारे हरवू अपूले /

ज्ञान-शास्त्र हे घेऊनि हाती

दूर करु असले-नसले  // १ //

ब्रम्हचर्य व्रत नीति नियम हे

सांभाळुनि जगती पाहू /

असले नसले दु:ख सोसुनी

निर्भय मनि होऊनि राहू // २ //

सत्याची अंतरे सुखविण्या

कष्ट सदा शरिरी वाहू /

सर्व जगाचा चालक तो प्रभु !

प्रेमाने त्याला गाऊ  // ३ //

तुकड्यादास म्हणे न घडे तरि

सद्‌गुरुला पुसण्या लागू /

भक्ति बळाने एकवटूनिया

या अपुल्या स्वरुपी जागू  // ४ //